اعرف كليتك....كلية الطب البشري

اعرف كليتك....كلية الطب البشري

  • الجمعة ١٦ أكتوبر ٢٠٢٠ - ٦:٢٢ م
  • 519

السلام عليكم ورحمة الله وبركاته

نتحدث اليوم بإذن الله

عن

" كلية الطب البشري"

دكاترة المستقبل أهلا ً بيكم 

سمعت عن نظام الطب الجديد في مصر؟ 
يعني ايه Integrated medicine ؟؟
 هدرس ايه في طب؟!
 طب هتخصص امتى ؟؟

 ايه هو نظام الطب الجديد (5+2)

بداية من السنة الي فاتت تم تطبيق نظام الطب التكاملي في جميع كليات الطب في مصر، وهو النظام المعترف بيه عالميا ً
وبقت سنين الدراسة في الكلية ٥ سنوات ( بدلا ً من ٦) + سنتين امتياز ( بدلا ً من سنة)
وده عشان نزود مدة التدريب وتبقى دكتور شطوور أموور

الطب التكاملي " Integrated medicine"

كمان نظام الدراسة في الكليات اختلف، وانتقل من الاعتماد على التلقين والحشو إلى نظام بيعتمد على الفهم والتفكير النقدي البناء ، وبيتهم انه يبني شخصيتك كطبيب وكإنسان من أول يوم في الكلية.

وده ازاااي بقى  ؟!! 

أولا ً : نظام الدراسة بطريقة الموديول "module" وده معناه انك بدل ما كنت هتدرس كل مادة لوحدها، هتدرس كل جهاز في الجسم لوحده بكل المواد المرتبطة بيه،، يعني مثلا ً هتدرس الجهاز التنفسي " respiratory system"ده كموديول لوحده.

وهتاخد فيه الأناتومي بتاع الجهاز التنفسي يعني هتعرف هو بيتكون من ايه وشكله ازاي  كمان هتاخد الفسيولوجي بتاعه الي هو طريقة عمله ،، والباثولوجي ( ايه الأمراض الي ممكن تصيبه) والفارماكولوجي ( الأدوية الي بتشتغل عليه) وهكذا...

يعني المواد مش هتبقى منفصلة عن بعض،، لا دي هتكون بتكمل بعض وبتساعدك تفهم الموضوع بطريقة جميلة جدا ً وعشان كده اسمه الطب التكاملي " Integrated medicine"

 طيب ايه المواد الي بندرسها في كل موديول؟

الأناتومي : علم التشريح

الفسيولوجي : علم وظائف الأعضاء وازاي جسمك بيشتغل 🌀

البايو كيمستري : علم الكيمياء الحيوية 🧪( بتدرس التفاعلات الي بتتم في جسمك زي البناء والهدم والي هي ضرورية جدا ً للحياة)

الهستولوجي : علم الأنسجة، وده بنعرف فيه تركيب الخلايا المختلفة في الجسم وشكلها تحت الميكروسكوب 🔬

الفارماكولوجي : علم الأدوية ، وبتعرف فيه أسماء المواد الفعالة للأدوية وتركيبها وطريقة عملها،، كمان بتعرف ازاي الدوا بيشتغل في الجسم
( عشان متجيش تسأل بعد كده هي البرشامة بتعرف مكان الألم ازاي؟! 🤔😂😂😂)

الباثولوجي : علم الأمراض 🌡️، بتعرف فيه ازاي المرض بيحصل في الجسم وشكل الخلية المصابة، وشكل العضو كمان من بره إلخ إلخ ✳️

الميكروبيولوجي : علم الكائنات الدقيقة وبتعرف فيه تركيب الفيروسات والبكتيريا 🦠 والفطريات
وأي كائن دقيق ممكن يسبب عدوى للإنسان،، وازاي بتحصل العدوى وازاي نعالجها ونحمي نفسنا منها وهكذا....

الباراسيتولوجي : بتتعرف فيها على الديدان المختلفة اللي ممكن تسبب عدوى ، ودورة حياة الدودة الكريمة 🐛 المعدية
وكمان الطفيليات المختلفة....

دي هي المواد الأساسية الي هتكون موجودة معاك في كل موديول 

أول سنتين ونص في الكلية هتدرس ال basics أو الجزء النظري وبعدين هتدرس الجزء ال clinical في السنتين ونص الباقيين .

📢طب ايه تاني مختلف ؟!

النظام الجديد كمان بيدربك على مجموعة من المهارات المهمة جدا ً والي هتحتاجها في حياتك بعدين

 زي مهارة " العمل ضمن الفريق"

هتتقسموا لمجموعات صغيرة"teams"
كل تيم مكون من ستة أشخاص مثلا ً، طيب هنعمل ايه؟ 

بيبقى فيه حاجة اسمها " group discussion" دي منفصلة عن السكاشن ، وفي كل مرة بيتطلب منكم انكم تتناقشوا في موضوع معين يخص اللى انتوا درستوه خلال الأسبوع ✍️💫

المناقشة دي بتكون بكذا بطريقة،

إما إن الدكتور بيعرض عليكم " case " يعني حالة مرضية معينة 🤕 وبتتناقشوا فيها كل تيم على حدة وطبعا ً بمتابعة الدكتور.

أو إنك بتعمل presentation أنت والتيم بتاعك بتقدموا الموضوع بطريقة مبسطة وتشرحوه لزمايلكم 💒
وده هيعلمك مهارة جديدة، ألا وهي

"Presentation skills"

💣 حاجة كمان مختلفة إن امتحانات الشفوي
اتلغت في النظام ده

💣 الحضور في الكلية إجباري لأن النظام بيعتمد على الساعات المعتمدة، بمعنى إن ليك عدد ساعات معينة لازم تحضرها كل موديول،، ونسبة حضورك لازم تكون ع الأقل ٧٥ ٪ عشان تقدر تدخل امتحان الفاينال .

💣 بتدرس كل سنة مادة مش بتتضاف للمجموع ولكن بتفيدك جدا ً زي أخلاقيات المهنة "ethics" اللي هتدرسها في أول سنة .

💣في بعض الجامعات بتنزل تتدرب في المستشفى من أول سنة، وبتشوف الحالات اللي درستها بعينك في المستشفى

💣 النظام الجديد كمان بيهتم جدا ً إنه يربطلك الموضوع اللي بتدرسه بالجزء ال clinical عشان تبقى فاهم بنستفيد منه ازاي عمليا ً ودي ميزة تحفة جدا ً ♥️

💣 آخر حاجة أنه نظام semesters يعني كل ترم "semester" بتدرس عدد من الموديولات وبتمتحن فاينال عليها في آخر الترم مش آخر السنة .

 

🌾 تمام خلاص كده دخلت طب

 

وتخرجت بعد ٧ سنين🎓 ، مبروووك يا بطل وبقيت دكتور قد الدنيا ، ايه الخطوة الجاية؟

🌾 بعد الامتياز بتاخد تكليفك في وحدة صحية بتشتغل كممارس عام (general practitioner)

🌾 بعد ما تخلص التكليف بتاخد نيابة سواء في مستشفى الجامعة أو مستشفيات وزارة الصحة ( حسب مجموعك التراكمي) وهنا بتختار تخصصك.

🌾 وتحضّر بقى الماجستير بتاعك ، ثم الدكتوراه .

دي باختصار رحلة طالب الطب في مصر 🇪🇬 ✨

 أخيرا ً، الكلية مش سهلة وعايزة مجهود كبير جدا ً ومذاكرة كتيير، وطاقة كبيرة 💙 ، بس مع ذلك هي كلية جميلة جدا ً ولو أنت بتحب الطب هتحب الكلية وتستحملها ♥️

وكفاية قول ربنا _سبحانه وتعالى_ " ومن أحياها فكأنما أحيا الناس جميعا ً" ♥️

بالتوفيق للجميع 

 

فيديو

https://www.youtube.com/watch?v=qZzYFgNreL4

 

شكرا لكم....





أبحث عن أختبار