أعرف كليتك.....كلية الزراعة

أعرف كليتك.....كلية الزراعة

  • الجمعة ١٦ أكتوبر ٢٠٢٠ - ٥:٤٦ م
  • 221

السلام عليكم ورحمة وبركاته

هنتكلم بإذن الله عن
كلية الزراعه جامعة الأزهر

مكانها: مدينه نصر
عدد سنوات الدراسة 4
الكلية تم أعتمادها
عدد الطلاب المقبولين كل عام
تقريبا 1000 طالب
كل موادها عملى
تقريبا 5 مواد فى كل ترم
التخصص فى بدايه العام 3
-----------------------------
نتكلم بقااااااااا بالتفصيل
وهنتكلم عن كليه عمليه موجوده لشعبه العلمي واللي كتير منكم مش عارفين حاجه عنها إلا قلييييل....
كليه الزراعة جامعه الأزهر

أولاً وقبل كل شيئ الكليه ده عظيمه جدا للي يعرفها وعاوز ياخد منها علم
رغم إن أول متيجي في بالك بتسمع كلمه (فلاح) و اللي يقلك ايه ده انت كلية زراعه قسم خراطيم
وللأسف معتقدات غير صحيحه لكن هتسمعها كتير من اللي ميعرفش حاجه عنها.


من أصعب الكليات اللي ممكن تتدخلها مش هقول هي الأصعب لكن بالنسبه للطلبه اللي بيدخلوها إنهم منهم كتير داخلها عشان مجموعه ومش مهتم ومن الناس اللي بتذاكر ضعيف هتتعب فيها جدآ لأنها مفيهاش ابدا وقت للكسل.

هبدأ الأول بالمواد بتاعتها :
بتاخد في سنه أولى وهي سنه سهله نوعاً ما لما الناس تدخل تانيه وتشوفها
عندك 17 ماده تشكيله حلوه كده من مختلف المجالات
في الترم الأول :
1-مبادئ اقتصاد كلي
2-اساسيات علم الحيوان
3-مساحه
4-رياضه
5-كيمياء مهمه
6-مورفولوجيا نبات مهم جداً جداً
7-حشرات
8-انجلش E
الترم الثاني :
1-كيميا مهمه
2-اقتصاد كلي
3-فيزيا
4-تقسيم نبات مهم جداً جداً جداً جداً جداً جداً جداً
5-ارصده جويه مهمة
6-اجتماع
7-فقه
8-عقيده
9-قرآن

عندك كل يوم من الحد للخميس من الساعه 9ص للساعة 6م قاعد ف الكليه إلا أيام قليله ممكن تمشي 3 أو تروح متأخر شويه اغلب الأيام محاضرتين وسكشن. 
عندك في كل ماده محاضرات وسكاشن إلا المواد الشرعيه.
في مواد زي اقتصاد و إجتماع ورياضه مش صعبين اووي وسكاشنهم ساعه ونص فقط
أما حشرات و كيميا ونبات 3 ساعات.


أول متسمع إنك عندك نبات تحترم نفسك وتذاكر من اول يوم وتمشي ميري مع القسم ده مبيرحمش حد بمعنى الكلمه حرفياً مفيش طالب متعلمش عليه من القسم و50% من الدفعه بتشيل نبات حاجه اعتياديه فنصيحه اخوي اوعي تنسى الكلام ده إياك ثم إياك من النبات.

 
طبعآ الكليه فيها عملي كتير عندك في سنه أولى تشريح نبات وتشريح حيوان
هتشرحوا نباتات وحيوانات زي الضفدعه .


وعندك عملي في الفيزياء هتعمل 9 تجارب في المعمل بايدك
والكيمياء هتحبها اوي لذيذه وتقريبا هتدرس اول ترم عضويه.

 
هتفضل ف المعمل ساعه ونص تاخد كلام ورا المعيد وساعه تعمل تجارب َتركب مواد ع مواد وتحصل حاجات غريبه وعجيبه هتعجبك اوي وممكن تحرق نفسك وزمايلك لو مسمعتش كلام المعيد .


من الحاجات المطلوبه منك في الكليه آول يوم هتسمعها في السكاشن :

البالطوا معاك يا بشمهندس كل سكشن من غيره مش هتدخل
أدوات التشريح وأدوات الكيميا الفوطه والانابيب والحامل
وأدوات التشريح والشرايح كل ده هتلاقيهم بيتباعوا في الكليه من اول أسبوع
السكاشن فيها غياب وحضور والقانون بيقول غياب اكتر من 3 سكاشن ف الترم ف الماده يمنع دخول الإمتحان
طبعآ عشان مضحكش عليك القانون مبيتطبقش أوي بس ممكن لو معيد ضربت ف دماغه ميدخلكش الإمتحان ويضيع عليك الماده كامله ومتقدرش تعمل حاجه فاحترم نفسك واحضر عشان متتذلش.


الكليه للي ناوي يجتهد ويذاكر جميله جدآ للي ناوي يقضيها هيقعد فيها 10 سنين مثلاً وهيعدي طب كمان
المعيدين احترمهم واتعرف عليهم كويس وصاحبهم معظمهم كويسين جدا والتزم معاهم هتفرق معاك جدا ف التقدير
اي ماده غير الشرعي عليها 40 عملي و 60 نظري ...


آل 60 مش مضمونين إطلاقاً فلازم تهتم بال40 اوي عشان لو وقعت لو حليت سؤال واحد أو اتنين نظري تنجح مرتاح
وفيه مواد بتضرب ف 4 و 3 يعني من 300 و 400
ال40 دول يعني احترام معيد مفيش غياب عمل الشيتات تحضر العملي كويس وتكمل المذكرات

التخصصات :


الكليه فيها 15 قسم بتتخصص من سنه 3
عشان تضمن تدخل قسم عالي لازم تجيب ف مواد سنه أولى كيميا ونبات تقديرات عاليه والتقدير العام هتلاقيه كويس
مش وقته اقلك ع الأقسام دلوقتي لأنهم لسه ف 3 وهتعرفهم لما تدخل أولى المهم تهتم بأولى عشان فيه أقسام زي كيميا بتشترط انك جايب ف الكيميا جيد وجيد جدا ف أولى

نيجي للتنسيق :
كليه زراعه للبنين فقط وليها فرعين
1-قاهره وكانت من 73
2 أسيوط وكانت من 67

طيب هي الكليه ده ليها شغل :

الكليه ده اكتر كليه فيها شغل كل شركات الصناعات الغذائية والالبان والزبادي والمراعي الحيوانيه والبساتين والعطور وكل الإنتاج الحيواني والدواجن والأسماك ومعامل الكيميا والمبيدات والنباتات وامراضها والأراضي الزراعيه بتطلب طالب زراعه للأسف
لكن باكد تاني المجتهدين بس والمعيدين بينقوا الطلبه الكويسين وبيتعينوا ع طول غير انك ممكن تبقى معيد ودكتور ف اي قسم من 15
وكفى......


 مجالات عمل اقسام كلية الزراعة

 أقسام كليه:

زراعه كلها وفرص عملها للناس الي كانت بتسال عن كلية زراعة
الاقسااااام :
---------------
" الاقسام دي موجودة في معظم جامعات مصر "
(1)- قسم الهندسه الزراعيه (خاص بطلاب علمى رياضه فقط )

مجالات العمل :-
-----------
- مهندس ميكنه ومطلوب فيكل المزارع الكبيره
وهو المسئول مع فريقه بصيانه وتصميم شبكات الري والابار وصيانه جميع المعداد الزراعيه والتعديل عليها والتعاقد على المعداد الزراعيه والجرارات
- مهندس لتركيب شبكات الري
- مهندس مساحه ريفيه
- مهندس طاقه ريفيه
- مهندس لتصميم بيوت محمبه
ــــــــــــــــــــــــــــــــــــــــ
(2 )برنامج البايو تكنولوجي:-
بيضم 3 اقسام (الوراثه والكيمياء الحيويه والميكرو بيولوجي )
#مجالات العمل :
--------------
مجالات العمل المتوقعة للخريجين :
1) المجال الطبي والصحي والصناعات الدوائية:
-كيميائي بمعامل التحاليل الطبيه
- المختبرات الطبية والتشخيص الوراثي (للأمراض المعدية و الوراثية والسرطان).
- بحوث وعمليات استنبات الأنسجة .
- صناعة وإنتاج الأدوية والمستحضرات الطبية بوسائط بيولوجية:
- صناعة المضادات الحيوية.
- صناعة الأدوية المضادة للسرطان .
- صناعة الأمصال واللقاحات والأجسام المضادة.
- إنتاج الهرمونات وعوامل النمو.
2) المجال الزراعي:
-معامل تحليل التربه والنبات والمياه
- إنتاج الأسمدة الزراعية عبر التخصيب الحيوي باستخدام الكائنات الدقيقة .
- معالجة النفايات الزراعية (الكتلة الحيوية) واستخدامها كمصادر بديلة للطاقة (توليد الغاز الحيوي-توليد الكحول) .
- استزراع وإنتاج الفطريات الغذائية .
- المقاومة الحيوية للآفات الزراعية .
- الإنتاج الحيواني :
- تطوير مصادر جديدة لتغذية وتربية الحيوانات مثل إنتاج الخمائر الغذائية وتربية واستنبات أنواع من الطحالب والفطريات الغذائية والتي تستخدم في تصنيع العلف للحيوانات .
- البدء في إنتاج نباتات معدلة وراثيا تكون أكثر ملائمة للظروف المناخية
- استخدام التشخيص الوراثي في الكشف عن الأمراض النباتية والحيوانية.
3) شركات تجارة الأجهزة والمعدات:
- شركات الأجهزة الطبية المخبرية.
- معالجة وإدارة النفايات والمخلفات البيئية وإعادة استخدامها (تدوير النفايات) .
- استخدام معالجة وإعادة استخدام المياه العادمة .
- استخدام المخلفات البيئية كمصادر محتملة لإنتاج الوقود الحيوي ( الميثان –الكحول الايثيلي ).
4) مجال الصناعات الكيميائية ( التخليق الحيوي للمنتجات الكيميائية ):
- إنتاج الكحولات .
- إنتاج بعض الغازات الصناعية والطبية .
- إنتاج الأحماض العضوية المختلفة مثل حمض الاستيك وحمض الستريك.
- إنتاج البلاستيك الحيوي وهي مرحلة متقدمة من التخليق الحيوي للمنتجات
ــــــــــــــــــــــــــــــــــــــــ

 

 

(3) قسم الانتاج النباتى
مجالات العمل :
-----------
قسم انتاج نباتى من اكثر الاقسام طلبا في العمل لتنوع مجالات عمله
ومعلومه العمل في الانتاج النباتى والمزارع مربح جدا جدا
وكثير من رجال الاعمال الاغنياء كونوا ثورتهم من الزراعه
وانا دلوقتى بدرب في مزرعه انتاج نباتى المهندس يبدأ عمله بمرتب 2500 +التامين
وبيشتغل 21 يوم بياخد 9 ايام اجازه وفي مهندسين راتبهم بيصل الى 6 و 7 الاف جنيه وسنهم لا يتعدى 32 سنه
ولو الواحد ركز انه يبقى ليه مشروعه يقدر يكسب اكتر وبارباح كبيره جدا بس طبعا يكون عنده الخبرة الكافيه
خريج قسم انتاج نباتى يقدر يشتغل في :-
1- معيدا في الكليه ( تصلح للبنات )
2- في مراكز البحوث (تصلح للبنات )
3- المركز القومى للبحوث (تصلح للبنات)
4- مهندسا زراعيا في مزارع الفاكهه والخضر والمحاصيل
5- مصمم حدائق (لاند سكيبر) (تصلح للبنات)
6- مشاتل الفاكهه والخضر والزينه (تصلح للبنات) لان اغلبيه المشاتل بتبقى في اماكن قريبه من الجيزه والقاهره والعمل فيها بيبقى الصبح ولو مركزين هتلاقوا المنيل مليان مشاتل زينه وفي اماكن كتيير اوى قريبه فاكهه
7- في شركات انتاج التقاوى (تصلح للبنات)
8- مراقب جوده في مصانع تصنيع الفاكهه والخضر (تصلح للبنات) يعنى المهندس بيشوف جوده الثمار الى داخله المصنع وبيراقبها
9- في محطات التعبئه وفرز الفاكهه والخضر (تصلح للبنات)
10- في وزارة الزراعه (تصلح للبنات )
ــــــــــــــــــــــــــــــــــــــــ

 

(4)قسم انتاج حيوانى
#مجالات العمل :
-----------
1-مهندس زراعى في اي من مزارع الدواجن
2- مهندس زراعى في مزارع الاسماك
3- مهندس زراعى في مزارع الماشيه والحلاب
4- مهندس في معامل التفريخ
5-مهندس في مصانع الاعلاف المختلفه
وايضا الانتاج الحيوانى ليس له بديل وشئ ضرورى للانسان وبلتالى عليه اقبال كبير ومربح جدا ومن ميزة هذا القسم ان العمل فيه بعد التخرج مطلوب جدا وسهل جدا
وايضا عمل مشروع خاص ليس بالتكاليف الكبيره مثل باقى الاقسام فسهل جدا ان تبدا براس مال ليس بضخم
ــــــــــــــــــــــــــــــــــــــــ

(5)-قسم علوم الاغذيه
-----------------
#مجالات العمل :
-----------------
مراقب جوده او مهندس انتاج في كل مصانع الالبان والصناعات الغذائيه
مثل جهينه -فرجللو- نسلة- امريكانا -المراعى
تقدر تعمل فيه دبلومات بعد ما بتخلص كلها جميله جدا ف مجالات الميكرو و الكيميا و الايز و الهاسب ودبلومات تانيه كتيررر ده غير ان ف دبلومة بتتعمل ف القسم عن تغذية الانسان و بتبقى منها اخصائي تغذية ومجالات شغل القسم عمتن ( مهندسين الجوده ف مصانع الاغذيه و الالبان - مراقبة الجوده - التحيليل الكيميائي - التحليل الميكروبيولوجى - اخصائى تغذيه انسان - الفنادق و المستشفيات تخطيط وجبات و نظم التغذيه )

 

(6)قسم وقايه النبات
مجالات العمل
يستطيع خريج هذا القسم ان يعمل
1- مهندس مكافحه في مزارع الانتاج النباتى
2- تحليل وتركيب المبيدت
3- في شركات المبيدات والاسمده في مجال التسويق وهو مربح جدا مثل شركات شورى وسينجنتا
4- مهندس في مناحل العسل
(7)قسم الاراضي والمياه
#مجالات العمل :
1- الهيئة القومية للاستشعار عن بعد و علوم الفضاء
2- معهد بحوث الاراضي و المياه والبيئة
3- المركز القومى للبحوث
4- اكاديمية البحث العلمي
5- مركز البحوث
--------------------------------------------
- هندسة زراعية على مستوى الجمهورية قسم في كلية زراعة وخريجها بيلتحق بنقابة الزراعيين وخريج علوم زراعية وهندسة زراعية الاتنين بيتكتبلهم في البطاقة مهندس زراعي بس في الازهر كليه لوحدها وده مش بيغير أي حاجه يعني !

- تجارة احسن ولا زراعة؟
مفيش ادنى وجه مقارنة زراعة كلية عملية بالطوا وسكاشن وتشريح وكيميا وفيزيا ورياضة وانتاج وميكرو وفسيولوجي ..الخ
تجارة كلية دراستها مختلفة تماما احصا ومحاسبة واقتصاد ورياضة وادارة وقانون وكده انما مفيش تشريح ولا شغل معملي او حقلي يعني دراستها اقرب للنظري واختيارك بيكون حسب ميولك ..

-----------------------------------

 

فيديو

https://www.youtube.com/watch?v=cDaI9HY39Aw

شكرا لكم





أبحث عن أختبار