اعرف كليتك... كلية الأسنان

اعرف كليتك... كلية الأسنان

  • الجمعة ١٦ أكتوبر ٢٠٢٠ - ٤:٤٩ م
  • 257

السلام عليكم ورحمة الله وبركاته..

اليوم نتحدث بإذن الله عن

كليه الأسنان

الكلية اللى ف ناس بتكون جايبه اعلى منها  كطب بشرى ويسيب بشرى عشان يروح اسنان.
الى هيدخل طب اسنان يعنى شخص بيحب يذاكر ومجتهد وفى نفس الوقت دلوع وبيحب يظبط نفسه ..

طب ايه الفرق بينها وبين الطب البشري يعنى ماهو دا طب ودا طب بردو !
الفرق انك بدل ما هتدرس الجسم كله وبعدين تتخصص هتتخصص من اول سنة ليك فالجامعه بدل ما تتعرض لتنسيق تانى جوا بشرى لا انت من الاول كدا اختارت اسنان ،
طيب خلينا متفقين ان اسنان كلية مش تافهة وسهلة و بس اسنان اخف من بشرى نفسيا وجسديا وعصبيا ..
،،
لازم تكون بتحب تشتغل عملى اكتر لأنك طول الكلية بتدرس وبتشوف الى بندرسه عملى و تطبقه يعنى العملى فيها اكتر وبتشغل بايدك من اول سنة .
وبتبتدى تنزل العيادة من سنة تانية بس بتبتدى تشتغل على مريض حقيقة جايلك عيادة جامعه الازهر عشان يتعالج من سنة تالتة.

ايه دا يعنى هى كام سنة ؟
طب اسنان عبارة عن سنة فعلوم ( ودى هنتكلم عنها كمان شوية ) وعبارة عن ٤ سنين فكلية طب اسنان وكام شهر كدا بتشتغلهم فالعيادة بعد ال ٤ سنين وأعمل حسابك لانها بتحتاج مصاريف وفلوس كتير عليك شوية
واللى مش قادرين الجامعه عندنا بيظبطوهم يعنى ، مفيش قدامك حجة ودا مش مانع.

كلية طب اسنان بنات من احلى واشيك الكليات الى فجامعه الازهر بنات ، تدخل فيها تلاقى التكييفات شغالة وكلمة دكتورة بتتقال رايح جاى حتى وانتى لسة فاعدادى ، معاملة جميلة وهيدخلوا هتلاقوا المكان متزين واجمل من اى مكان فالجامعه ...
هتقضى اول سنة اعدادى اسنان فكلية علوم !
طب هعمل ايه فعلوم ،، السنة دى سهلة جدا
والصعوبات الى هتقابلها هتكون فاول شهر بالكتير وبس على ما تتعود انك تزاكر كلو بالانجلش ، وعلى ما تاخد صدمة الجامعه هتكون ف مكان تحسه شقه بيتك يعنى صغنون وعلى قدنا ( الكلام دا للبنات بس عشان جامعه البنين ملهاش اول من اخر وطب اسنان فيها على اعلى مستوى واخر شياكة )
طب هدرس ايه !
فاعدادى اسنان هتدرس : كيميا وفيزيا وحيوان ( هستولوجى وسيتولوجى وفسيولوحى و فقاريات ولا فقاريات ) وكمبيوتر وقران ومادة شرعيه واينجلش ومادة المصطلحات الطبية ، ودا فالترم الاول ، الترم التانى مفيش حيوان ، بس الكيميا بتنقسم ترم اول الكيميا عضوية الفاتى وكيميا اروماتى ، والفيزيا عين واذن وحرارية انما الترم التانى كيميا غير عضوية وكيميا فيزيائية ( متتخضوش كل دا جميل وتحفة ومجرد ما تعدوا اول شهر فالدراسة هتبقوا زى القل ) واجب اطمنكوا ان دى سنة تقديرات اه وسهلة
و المفاجاة مبتتضافش لتقديرك العام يعنى خشها بنفس صافية كدا مجرد انها تزود حماسك + تدخل منها مدينة عشان لما تنورنا فاسنان تبقى داخل بنفس مفتوحة ...
هتلاقوا شوية بهدلة فالمعاملة فعلوم !
وللاسف هتتعبوا شوية على ما هتلاقوا مدرجات تاخدوا فيها المحاضرات ، بس كل دى شكليات

اما بقا الولاد بناخد ف الحيوان
فسيو وهستو وسيتو وبارا سيتولوجي
بارا بدل مادة الفقاريات واللافقاريات دي 
ومنهج الفيزياء مختلف ... ترم اول بناخد قوانين الحركة ودراسة للموجات عموما المستعرضة والطولية
والترم التاني بناخد نووية ودراسة الضوء
وكهربيه ومغناطيسية ...

وملحوظة بقا كمان .. ان مادة الانجلش والمصطلحات الطبية
والقرآن هتمتحنهم اخر السنة
يعني مش هتمتحن فيهم ترم اول 


لما تنورونا هتاخدوا مواد طب بشرى الخاصة بالhead &neck بس
لكن بشرى بياخد كل الجسم وبتاخدوا مواد اسنان والعملى بتاعها طبعا ، بس عموما العملى بيبقى اكتر وعايزين جراة والتعامل مع المريض وايدك تكون تتلف فحرير ، اهم حاجه تكون حابب المجال دا ،
طب انا قررت ادخل اسنان المفروض اعمل ايه فالاجازة دى ! ( زود الاينجلش بتاعك ، اقرا كتير واسمع لانك هتحتاجه من اول سنة لحد الى ما لا نهاية ،، ركز على اينجلش بتاعك واستمتع فالاجازة كلها.

 

فيديو

https://www.youtube.com/watch?v=rZhSb52Z9aY

شكرا لكم...





أبحث عن أختبار