اعرف كليتك ......كليه صيدلة

اعرف كليتك ......كليه صيدلة

  • الخميس ١٥ أكتوبر ٢٠٢٠ - ٩:٢٤ م
  • 262

السلام عليكم ورحمة الله وبركاته...

نتحدث معكم بإذن الله

عن

كلية صيدلة

اسمها صيدلة مش كليه البايعين.

- الكلية 5 سنين فقط لا غير وده ع حسب اللائحة الرسمية اللي اتطبقت ع الدفعات اللي فاتت دي، ونظام الكلية ف المواد اتغيير ودي حاجه كويسة.

-صيدلة كمجال شغل حدث ولا حرج .

 المهم المجالات بقي باختصار..

1-كميونتي ، ودي معناها أنك تشتغل الصيدلية.

2-شركات الأدوية ،ودي وظيفتنا اصلا صيادلة أننا الل بنعمل الدوا من البداية خالص لحد ما ياخد الموافقة انه ينزل السوق وهكذا ..

شغل الشركات ممتع بصراحه ، زي ما دكتورة قالت لنا مرة * بتحس أنك بتعمل حاجه * بس محتاجه اجتهاد منك وخبرات عشان تتقبل اكيد .

3-مجال التسويق أو المديكال ريب : ودي الناس اللي بتلاقوها عند الدكاترة أو الصيدليات وبيحاولوا يقنعوهم أنهم يصرفوا للعيانين من الدوا اللي شركتهم يتعلمه ،ودي أنت وشطارتك بقي ف مجال التسويق وإقناع الل قدامك .

4-اكاديمي : ودي أنك تحضر وتكون دكتور ف الجامعه 5-تشتغل ف مجالات البحث العلمي ، دي متعبه بس جميلة للي مهتم بالحاجات دي .

6-بعض الناس بيحضروا دبلومة كلينكال ويشتغلوا ف مستشفيات زي 57 أو أي مستشفي عموما .

7-ممكن تحضر دبلومة بردو وتفتح معمل تحاليل زي بتاع علوم 

8-تشتغل شغل حكومي عند وزارة الصحة

9-ممكن تسافر برا البلد اصلا ،أكتر دولة بتأوي الصيادلة هيا ألمانيا ، بس سمعت أنهم حاليا لازم تكون بتعرف تتكلم الماني عشان تعرف تسافر

ولما تتدخلوا الكلية هتكتشفوا كل حاجه بالوقت ، هتنبهروا اد ايه دور الصيدلي عظيم جدا ،

=المواد بقا

الترم الأول 6 والتاني 8

 

الأول :

1-اورجانك : عضويه ، لا مش زي بتاعت ثانوي لا  بس طبعا بتعتمد ع أساسيات ثانوي ، العملي بتاعها لطيف جدا وكله بنزين وفينول وطولين وحمض خليك* اللي هو بالمناسبة هتبقي اسمه acetic acid* 

بس خلوا بالكم لأن المعمل اغلبه مواد سامة وبتفرقع ، اتبع الخطوات اللي هايقولوا عليها وهاتبقي تمام .

2-عقاقير ، فارماجوكنوزي ، نباتات طبيه *كل ده اسماء متعددة لماده واحدة وبتتقال دايما عقاقير المهم من اسم نباتات طبيه بتدرسوا النباتات اللي ليها استخدامات طبيه ..

ماده احم حفظ بحت انا بامانه مشوفتش فيها اي سبيل للفهم بس فيه دكتور عندنا مصممة انها بتتفهم  كل نبات ليه اسم واسم أب واسم عيلة ، واسم لاتيني واسم انجلش ومواده الفعاله والغير فعاله واستخداماته والحالات اللي مينفعش اخدها معاها وليلة كبيرة اوي سعادتك، العملي بتاعها ، بتتعرف ع البودر بتاع النبات ده تحت الميكرسكوب عن طريق اني هاشوف بعض الاشكال الل بتميز نبات عن التاني ، وفيه بعض النباتات ممكن نميزها بالطعم والريحة * اه بندوق وبنشم عادي يعني مثلا النعناع والقرفة والقرنفل أنت مش محتاج تفحصهم اصلا ، بس لازم نفحص ف الامتحان لأنه عليه درجات واحيانا البودر بتطير ع بعض.

3-هيستولوجي: ودي مادة من طب ، احنا بناخد جزء بسيط جدا منها وهيا سهله ، الجسم بيتكون من خلايا وانسجة واعضاء واجهزة وهكذا هيا بتتكلم عن ده ، الخلية بتتكون من ايه بتتصبغ بايه وانواعها وهكذا ، العملي بتاعها عبارة عن صور وتكتب اسم كل صورة وفيه كتاب رسم. *شبه رسومات الاحياء كدهو بس مش اوي يعني بقرب الفكرة بس.

4-كمياء عامة ، ماده مفيهاش عملي ، بتتكلم عن انواع الكميا عامةً وهيا بسيطة يعني.

5-فقه ، سهل مفهوش حاجه

6-انجلش ، أبسط مادة هتشوفوها يعني ، مواضيع اسلاميك وبعض الجرامر .. سهل جدا بصراحه .......

 

الترم التاني :

1- اورجانك تاني ، هتكملوا بقي زي طريقة الترم الاول * ع ايامي كنا بتاخد الاورجانك ع ترم واحد بس انتو خففوا وقسموا المنهج ع ترمين ..

2-اناليتكال: كيمياء تحليلية ، هتتكلم عن الانيون والكاتيون ازاي اكشف عنهم والتحليل الكمي والكيفي أيوة بتاع ثانوي ده ، بس انتو ف ثانوي خدتو التعريف بس  المهم حفظ كتير .. عايزه حفظ دي كمان بس خير دش تجيب تقديرالعملي بتاعها لطيف بردوا.

3-سيوتكس ، صيدلانيات ، صيدلة طبيعية *بردو دول كلهم اسم لمادة واحده المهم دي ماده لذيذة جدا معتمده أكتر ع الفهم ، وفيه ناس بتاخدها حفظ بس هيا لا افهم هترتاح كتير ، المادة دي اللي أساس صناعه الادوية الل مسؤلة عن ازاي الدوا يطلع بالشكل ده ميبقاش فيه رواسب مثلا ، ف سنة تانيه هتبدؤا تعملوا أدوية شرب بنفسكوا وتالته مراهم وكريمات ورابعه لبوس وهكذا.

بس انا طول حياتي مقتنعة أن اللي بنعمله عك مش أدوية نهائي

4-مصطلحات طبيه أو terminology ماده كويسة جدا ، مكناش بناخدها لانها لسه متطبقة ع بتوع السنه الل فاتت بس هتفيدكم جدا ، مفيهاش عملي.

5-تاريخ ومدخل صيدلة * نص عربي ونصها أنجلش* ماده بسيطة بردو بتتكلم عن ازاي نحسب الجرعة لحد وبتعتمد ع ايه ، بداية نشأة مجال الصيدلة اصلا ، وحاجات كتير حلوة جدا بس انا مش فاكره لاني بقالي سنتين دراساها مفهاش عملي بردوا

6-عقيدة ،لطيفه وكلام متعاد.

7-قرءان ، خمس أجزاء من الناس للاحقاف.

8-حاسب ورياضيات .. ماده كويسة.

وهتفيدكم ، بالنسبة للي فاهم كويس ف الكمبيوتر هتكون تافهه بالنسباله ، العملي بتاعها هيعلمكم ازاي تستخدموا برنامج الورد . معرفش رياضيات بيعملوا فيها اي لانها جديدة بردو ومخدنهاش .

- بس كده دي المواد ، ف بعض الحاجات بس عايزة اقولها 

1/ مواد الشفوي : اورجانك ، ، اناليتكال، سيوتكس، هستولوجي، عقاقير ، قرءان .

2/ صيدلة اسمها كلية الامتحانات ، بنمتحن أكتر ما بنستحمي  ممكن يجيلك اسبوع كل يوم امتحان وفيه اليوم الواحد امتحانين تلاته ، مش بخوفكم لا سمح الله بس هتتعودوا مع الوقت ويجيلكم تناحه .

3/ الكورسات: اول ما تدخلوا الكلية هتلاقوا كمية ناس بتعلن انها هاتدي كو رسات بالهبل يعني  فكك ، أو وربنا فكك من ده كله وهانعرفك بالكلية وبتاع فكك.بردو ، أولا الكورسات مش مجانية الكورس الواحد ببتاع500 ج ، احنا مره كان صحابي عايزين جزء بس معين من أصل أربع أحزاب وخدوه ب200 ، أنا مش ضد الكورسات بس مش من العقل أن م اول اسبوع تروح تاخد كورس أنت لسه متعرفتش ع المنهج ولا خدت الكتاب يا أخي ، ثم ان أغلب الدكاترة ف صيدلة بتشرح بجد ولو تابعت معاها مش هتحتاج الكورس والله ، أنا ف سنة أولي أزمت جدا معايا ف جزء معين ف السيوتكس كان ناقص اسبوع ع الامتحان وكان خلاص مش عارفه افهمه فعلا، .وقتها كانت المراجعات شغاله رحت حضرت .. فأنت أصبر ع نفسك ولو خلاص كده قفلت روح خد ، إنما مش من أول اسبوع ، اتقوا الله ف اهاليكم شوية.

4/ الدراسة بالانجلش فطبيعي جدا أول شهر متبقاش فاهم حاجه ولا عارف تذاكر واول شيت بعد تلت اسابيع م الدراسة متعرفش تحل فيه ، كل ده طبيعي والله انا أول شيت كنت حاسبه لنفسي اني هاجيب 4م10 ، كنت بمسك السطر اترجم كل كلمة فيه وبعدين مفهمش ف الآخر واعيط، دلوقتي بنذاكر من غير ما نترجم وبنخمن المعني وخلاص ..

فبلاش تحبطوا نفسكم كل ده طبيعي وهايعدي وهاتجيب تقدير ومش هاتسقط لا  بس أنت أتعب واصبر واستمع بالله ، الدكاترة بتشرح بالعربي وبالانجلش متقلقش ، احنا هنا مش ف جامعه أوكسفورد أو هارفارد هاتدخل تلاقي الناس بتبرطم انجليزي.

5/ لا كفاية كده ايدي وجعتني أقسم بالله  ، بس أخيرا متدخلش الكلية عشان اسم وبتاع لأنك كده مش هاتعمل حاجه وبلاش شغل الفشخرة ورايح جاي البالطو ع دراعك ، ده لمصلحتك أنت والله.

فيديو

 

 

شكرا لكم





أبحث عن أختبار