اعرف كليتك....كلية الدراسات الانسانية شعبة اللغات الاوروبية قسم الماني 

اعرف كليتك....كلية الدراسات الانسانية شعبة اللغات الاوروبية قسم الماني 

  • الخميس ١٥ أكتوبر ٢٠٢٠ - ٨:٣٢ م
  • 244

السلام عليكم ورحمة الله وبركاته...

مرحبا بكم إخوتي ...

اليوم سنتحدث

عن

كلية الدراسات الانسانية شعبة اللغات الاوروبية قسم الماني 
أو لغات الماني 


 القسم ده يمكن كتير ميعرفهوش أو ميسمعش عنه
انا كنت واحدة من الناس معرفش اصلا ايه الألماني ده وعرفته صدفةً قبل التنسيق بكام يوم وناس كتير نصحتني بيه وقالتلي انه قسم كويس جدا وليه مستقبل.

بداية القسم ده ثالث قسم في ترتيب اللغات بعد الانجلش والفرنش وتقريبا تنسيقه بيكون قريب جدا من فرنش بفرق حاجة من عشرة ف % بس للأسف القسم ده وباقي الاقسام غير E ,F مش ترجمة فورية وانما أدب يعني انت بتدرس أدب الماني وده عبارة عن كذا حاجة منها الجغرافيا بتاعتها ،الاماكن المهمة فيها ، السياسة هناك ،المأكولات وهكذا يعني بتدرس البلد الل هناك كمجمل وتتعرف على عادات وثقافة شعبها.
القسم ده من اجمل واحلى الاقسام في الكلية وبيقبل عدد كبير .

نبدأ بقى نتكلم عن الدكاترة ،احنا دكاترتنا من اجمل واحسن الدكاترة بيدو للطالب حقه كاملا متعاونين جدا جدا معانا وشغلهم كلهم بيبقى عبارة عن استنتاج وشرح عملي عشان يقدرو يوصلو المعلومة للطلبة على شكل لعبة او مسابقة.

اه والله بنبقى ف المحاضرة كأننا بنلعب مش بنحضر محاضرة عبارة عن سبورة وكلمتين يتشرحو وبس
أصعب حاجة ف الكلية انك من اول محاضرة الدكاترة ما شاء الله هيدخلة يتكلمو الماني فقط الماني الماني مش هتسمع كلمة عربي اطلاقا.
هتقولو طب واحنا هنفهم إزاي وصعب وكدا بس ده العادي إنك مش هتفهم كل حاجة.
بس نظام التعليم ف كليتنا بيعتمد ع الاستنتاج والفهم والتجاوب مع الدكاترة.
اكيد هتواجهو صعوبة ف الاول بس الشاطر الل هيقدر يكمل الشهر الاول الل هو اصعب حاجة.
بعدها هتلاقو نفسكم بقيتو تفهمو وتتجاوبو بسرعة مع الدكاترة مش لازم تفهم الكلام بس هدف الدكاترة من كل ده هو تعليمنا النطق الصح ونشوف مخارج الحروف بعد حوالي شهر بالظبط هتكون الدنيا اتظبطت وهتلاقو الدكاترة بدأت في الشرح الجد وحقيقي والبس يا معلم.
طبعا كل يوم هيعدي عليك وكل محاضرة هتحس مستواك بقى افضل من اللي قبلها وده طبعا بفضل الدكاترة وحضورك المحاضرات مهم اوي الحضور والتجاوب ف المحاضرة عشان تعرف تتكلم صح.
قسمنا من الأقسام اللي سهل تجيب فيها تقدير إحنا دفعتنا السنادي أكتر من نصها جايب جيد جدا والباقي جيد.

بالنسبة للمواد هما عبارة عن ١٣ مادة
منهم ٥ في الترم الاول
1- Gramatik او قواعد اللغة ودي ف الترم الاول بتكون بسيطة جدا ومن الكتب و بيدرسهالنا د اميرة و د مروة مع بعض.
2-ترجمة من اللغة الالمانية للعربية وبتكون حلوة وسهلة ود فاطمة هي الل هتدرسهالكم ونظامها ف الامتحان عبارة عن قطعة من الل هتترجمهم معاكم ف المحاضرات وقطعة من برا عشان تختبر مستواكم ف اللغة وحتة الفن والسنس بتاعك وبيكون امتحانها عبارة عن شفوي وتحريري بس سهل لا تقلقوا .
3- محادثة
ودي عبارة عن حوالي ٦ او ٧ محادثات هتاخدوهم طول الترم والدكتورة بتعملهم معانا المطلوب منك تعمل محادثة زيها بس بطريقتك وتعبيرك واسلوبك وامتحانها بيكون شفوي وتحريري برضو ومبيخرجش عن الموضوعات الل هتاخدوها 
د فاطمة برضو هي الل بتدرس المادة دي .

 

كدا دول 3 مواد تخصص ف الترم الاول ومضاف ليهم مادتين مش تخصص وهما

 


4- الانجلش والل يغتبر لغة تانية مع الالماني وده بيكون سهل جدا عبارة عن اسلاميك وشوية قواعد سهلة
5- نحو وصرف والمادة دي معانا الاربع سنين عشان المترجم الشاطر لازم يكون متمكن من اللغة العربية 

مواد الترم التاني 8


منهم 5 تخصص و 3 مش تخصص
1- ترجمة برضو بس من العربي للالماني ودي بتكون اصعب ف القواعد بس حلوة لا تقلقوا.


2- قواعد اللغة الالمانية برضو بس على توسع اكبر من الترم الاول هتدرسها د مروة بس وهيكون معاها صوتيات الامتحان بيكون مقسوم عليهم وشفوي وتحريري برضو
3 - landskunde او جغرافيا ودي من ارخم المواد الل هتقابلكم ف سنة اول بتتكلم عن الحضارة هنام والاماكن المشهورة والااكلات وماركات السيارات والسياسة ونظام الدولة وكدا يعني  بس لو حضرتو المحاضرات اول باول وحفظتو كل كلماتها هتبقى سهلة ان شاء الله  وفيها اعمال سنة.
4- مادة الlektüre او النصوص والقراءات ودي عبارة عن قطع زي بتاعة الانجلش كدا وعليها اسئلة وانتي فهمتي ايه منها وكدا ودي برضو بتدرسها د اميرة.
بتكون شفوي وتحريري
5- املاء وانشاء ودي عبارة عن مادة بتنمي عندك مهارة السماع عشان تتعود عن النطق ومهارة الكتابة والتعبير وهي مادة جميلة اوي ع فكرة من امتع المواد بالنسبالي.
ودي د فاطمة هي الل بتدرسها برضوا.
بيكون عليها اعمال سنة ٢٠ درجة على المواضيع والحضور
6- فقه اسلامي وده حسب الدكتورة الل هتدرسلكم سواء مالكي او شافعي وحلو ان شاء الله متخافوش 
7- عقيدة واخلاق ودي مادة معرفش ليها لازمة غير انها معقدة ،بس لو حفظتوها تضمنو التقدير فيها 
8- القرآن الكريم وبيكون عبارة عن

٥ اجزاء من سورة الناس 


القسم بتاعنا جميل جدا وبتتخرج منه تقدر تشتغل ف السياحة او الترجمة او التدريس ونقطة كمان ميزة عندنا مش عند اي قسم تاني ان الخمسة الاوائل في سنة اولى وتانية بيبقى ليهم منحة لالمانيا شهر يدرسو هناك قواعد اللغة 
تعالو قسمنا وهتحبوه بإذن الله .

شرح فيديو

 

شكرا لكم





أبحث عن أختبار