اعرف كليتك....كليه الدراسات الإسلاميه والعربية قسم اللغة العربية(مقال+فيديو)

اعرف كليتك....كليه الدراسات الإسلاميه والعربية قسم اللغة العربية(مقال+فيديو)

  • الأربعاء ١٤ أكتوبر ٢٠٢٠ - ٦:٥٣ م
  • 330

السلام عليكم ورحمة الله وبركاته....

مرحبا بكم إخواني وأخواتي  في موقعنا......

اليوم نتحدث علي كلية اللغة العربية...

 

هنتكلم شويه عن كلية الدراسات الإسلاميه والعربية

وبالتحديد هنتكلم عن قسم اللغه العربية:

 


 كليه الدراسات الإسلامية والعربية تنقسم ل 3 اقسام:


- قسم اللغه العربية


-قسم الشريعه الاسلامية


-قسم اصول الدين


قسم اللغه العربية:

 


إشمعنا لغة عربيه؟!


أولاً: لأنها لغة القرآن أفضل وأحسن وأشرف لغة علي الأرض.


ثانياً: لأنها أساس النجاح ف جميع الاقسام التانية.


ثالثاً: مفيده جداً ف تنمية العقل.


طلاب شعبة اللغه العربية بيقولوا إي ومين هما؟


هتلاقو ناس لطيفة بتعقدكوا فيها وهما اصلاً مايعرفوش عنها حاجه، كلامهم يدخل من الودن دي يطلع من التانيه ولو شوفتوهم مش هتسمعوا كلامهم. 


فى حاجه كويسة ف كليه الدراسات وهي إنك ممكن بعد ما تاخد الليسانس تاخد سنه تربوي أو
قسم اللغه العربيه ده ممكن تطلع منه معيد أو مدرس ابتدائي أو إعدادي أو ثانوي ممكن حاجه كمان ودي ال بتميزه عن باقي الأقسام إنك ممكن تدرس ف مدارس خاصة أو تربية وتعليم،

أو ياسلام بقا لو بتحب المغامرة وممكن تسافر مثلاً السعوديه لأنهم ف السعوديه عندهم مدرسين اللغه العربية دول حاجة عظيمة.


قسم اللغه العربية مش صعب أوفر زي ماهما بيقولوا لو إنتوا بتحبوا العربي هتمشوا فل فيه لو مش بتحبوا أو عندكوا ضعف ف مواده بلاش منه خليكم ف شريعه اسلامية.


القسم محتاج مذاكرة ومحتاج إنك تحضر كل المحاضرات

 
مواده حاجتين ياإما مواد ممتده ياإما مواد منتهية


المواد المنتهية: بتاخدها الترم الأول وبتمتحنها نص السنة.

المواد الممتدة: بتخدها من أول السنة وبتمتحنها اخر السنة.

مواد القسم :


الفرقة الأولي:

 الترم الأول المنتهية..
1.أدب جاهلي: وده عباره عن إنك بتعرف تاريخ الأدب وكل حاجه لازم يكون معاها أبيات شعر يعني لازم ع كل حاجه تحفظ بيتين أو 3 ده استشهاد او مثال الأدب من غير شعر أو نثر.

والأدب هيكون ع مر ال 4 سنين كل سنه هتاخد عصر فيه ؛ يعني مثلاً سنة أولي العصر الجاهلي.


2.علم لغة:

دكتورين بيشرحوا المادة دي

الدكتور الأول :بيتكلم عن أصل اللغة من ساعة ماربنا خلق أدم وإزاي اللغة اتوجدت وهتلاقو فيها أراء علماء.

والدكتور التاني : هيشرح معني علم اللغه وحاجات تانيه بس ماده لذيذه، بس  محتاجة حفظ شويه بس حلوه تابع ليها علم الأصوات والمعاجم والاوزان.

3.الإنجليزي:

 ماده بجد أسهل من منهج أولي ابتدائي يعني بالصلاة ع النبي هتاخد المضارع البسيط ودرسين كمان أزمنة وبس أو 4 علي  بعض بالكتير.

وفيه حاجه اسمها إسلاميك عبارة عن سؤال وجواب الدكتور هيترجموا معاك مش كتير وسهلين أصلاً هتلاقو الدكتور بيوضحلكم الأسئلة والحاجات ال بتيجي ف الامتحان من الكتاب مش بتطلع منه من الاخر الفاشل ف الانجليزي هيقفله.


4.البحث الأدبي:

وده بينقسم لجزئين جزء نظري وجزء عملي العملي عليه 20 درجه من درجه الامتحان وهو عباره عن بحث الدكتور بيطلبو منك تعمله وبيقولك الطريقه والمقادير وانت بتنفذ ال بيقوله قدامك انك تجيب من النت أو تروح مكتبه تاخد منها كتب وتصورها.

 
الجزء النظري سهل جداً عبارة عن شرح طريقة البحث يعني هتلاقي نفسك حفظته لوحدك عشان إنت لسه عامل بحث طبعاً البحث ده ليه وقت معين الدكتور بيحددوا...


نصيحه مني..

أول ما الدكتور يقول إعملوا بحث اعملوا  علي  طول عشان متضغطش نفسك فيه ويضيع منك أو تعملوا أي كلام

إبدا من أول السنة...

 

5.فن المقال:

 يعني اي فن مقال وازاي تكتب مقال ومقالات استشهاديه شبه الحواديت كده من الاخر هي ماده دش بس سهلة....


6.العَروض:

ماده لو اتفهمت واخدتوها بالطريقه الصح هتعشقوها وهتلاقيها دايماً ملزماكوا ف كل حاجة...

وهي عبارة عن أبيات شعر بتتوزن ع أوزان موسيقيه كده يعني هتلاقوا نفسكوا بتغنوها وإنتو بتذاكروا مش هتعمق اوي فيها عشان مش هتفهموا ال هقوله غير لماتخدوها.

 لو حسيت إنك مش فاهم من الدكتور خد كورس فيها وهتبقي زي الفل

لأنها ماده إلي حد ما عملي وفيها جزء نظري بس بسيط يعني من الأخر ياتحل يامتحلش لازم تتأسسوا فيها كويس لأن في ماده ف سنه تانيه معتمده ع ماده العَروض اسم الماده أوزان الشعر أو الأوزان.

 


..المواد الممتدة.. ال هتبقه معاك من اول السنه وهتمتحنها اخر السنة


1. القرآن الكريم:

المنهج عباره عن 7 ونص أجزاء من سوره البقره إلي سوره الأنعام يعني الأنعام معانا....


القران يتحفظ من أول السنة عشان الشفوي مهم جداً عليه نص الدرجه وال مش بيعدي ف الشفوي حتي لو مقفل تحريري بيشيل القران .. التحريري سهل يعني بيجي اوائل السور والارباع غالباً...


2.البلاغه:

ماده كويسة وحلوة بس طويله شوية عشان انت هتاخدها من أول السنه دي تتذاكر من الأول عشان لو إتكرمت عليك مش هتعرف تلمها ودي بتمتحن فيها شفوي وتحريري..الشفوي عليه 20 درجه والتحريري 80 درجة


3.النحو:

جميل جداً ومعظمه كلام عارفينه قبل كده وده بتمتحنه شفوي وتحريري شبه البلاغة..


4. التفسير: وده بيكون تفسير مواضع من عينه من المنهح بتاع القران بتاعك.

 

..مواد الترم التاني..


1. نصوص:

بتاخدو كام نص شعر علي  كام واحد نثر طبعاً دي لازم تتحفظ من الأول عشان ده أهم حاجة وتعريف الشاعر.

ونقد النص والحاجات دي.


2.الفقه:

سهل جداً وكله حاجات عارفنها.


3.صرف:

كويس مش وحش يعني سهل مش زي بتاع 3 ثانوي محتاج فهم وتشغيل دماغ بس واكيد فيه جزء نظري.


4.علم أصوات وتجويد:

هيكون كذا دكتور بيشرحوا عبارة عن مخارج الحروف وصفاتها وحاجات كده شبه التجويد شويه وهتاخدوا جزء تجويد سهل.
طبعاً المواد دي بتمتحنوها مع المواد الممتده أخر السنة يعني الترم الأول بتمتحنوا أول 6 مواد ال قولتهم ف الأول


والترم التاني بتمتحنو المواد الممتده مع المواد بتاعت الترم التاني بيبقو 8 مواد يعني كلهم ع بعض 14 ماده كل ماده عليها 100 درجه.


الإمتياز يتجاب لو جبت 90 % يعني تنقص 10 درجات ف كل مادة يعني تنقص 140 درجه طبعاً ده أقل حاجه ف الامتياز.


الجيدجداً حلو جداً كبداية ده بردو تقدير عالي.


إنتساب زي إنتظام فى الحضور وفي حاجه حاجه كويسه كمان إن لو واحد مثلاً كان انتساب ونجح ف سنه أولى

الكليه بتحولوا لإنتظام.


ملحوظة:


-لازم تحضروا المحاضرات.

-لازم تعامل الدكاترة بإحترام.

-ذاكر أول ب أول عشان ترتاحوا.

قبل أي حاجه طبعاً استخيروا ربنا.
كليه الدراسات الاسلاميه والعربيه كليه جميله جداً مش زي ما إحنا معقدين نفسنا منها بالعكس مفيده جداً.

 

شرح فيديو

 

وللدخول علي قناه اليويتوب 

اضغط هنا

 

شكرا لكم...............





أبحث عن أختبار