هو ينفع الراجل يتجوز على مراته بدون موافقتها ؟

هو ينفع الراجل يتجوز على مراته بدون موافقتها ؟

  • الخميس ٥ نوفمبر ٢٠٢٠ - ٢:٥٦ م
  • 272

- موافقتها مش شرط أصلاً. مش من حقها ترفض. وخد التقيلة دي كمان.. مش لازم يعرفها انه هيتجوز، مش شرط ومش واجب عليه، ومفيش نصوص بتقول انه لازم، فبلاش العاطفة تخلينا نفتي كده وخلاص !!

 

• أيوة بس لازم تكون مقصرة معاه أو مش بتخلف وله أسباب ؟

 

- لأ مش لازم.. ممكن تكون مش مقصرة ويتجوز عليها عادي .. حلال وبراحته. "فأنكحوا ما طاب لكم"، حوار مقصرة معاه ومش بتخلف والحاجات دي اسمها أسباب وحِكَم ربنا في التعدد .. مش شروط هي !!

 

• يتجوز عليها ليه يعني؟ فراغة عين؟ دي اسمها خيانة !

 

- ده كدا إتهام للنبي والصحابة والتابعين وتابعي التابعين بالخيانة وفراغة العين .. دي فطرة ربنا خلقها في الرجالة .. التعدد مش الخيانة .. هو ربنا خلقه يقدر يحب كذا واحدة مع بعض .. يتجوز براحته .. هو حر !!

 

• طَب ينفع تطلب الطلاق لمجرد إنه هيتجوز عليها ؟

 

- لأ .. النبي قال: «أيما امرأة سألت زوجها الطلاق من غير بأس فحرام عليها رائحة الجنة»، والتعدد في حد ذاته كَتعدد .. مش بأس أصلاّ !!

 

• طَب هي ينفع تطلب الطلاق لو ظلمها ؟

 

- آه طبعاً. هنا نقول إن ده اسمه بأس.. لو ظلمها في النفقة، المبيت، السكن، الفراش.. لإن حرام يظلمها؛ وفيه أشباه رجال كتير بيعملوا كدة للأسف !!

 

• بس النبي رفض إن "علي بن أبي طالب" يتجوز على فاطمة بنته ؟

 

- دي حالة خاصة لـ"فاطمة" بنت النبي، اللي قال ساعتها إنه مش بيحرم حاجة حلال.. هااا! وسيدنا "علي" كان هيتجوز بنت "أبي جهل" فكان من الدين ألا تجتمع بنت عدو الله مع بنت رسول الله في بيت واحد.

 

• يعني أنتوا سبتوا كل حاجة في الشرع ومسكتوا في التعدد ؟

 

- الأمر لا يعنيني. أنا بتكلم في الدين نفسه، مش ذنبي انك وافقتي على راجل واخد الدين بالشكل ده ورضيتي، ولما فكر يتجوز عليكي عملتي فيلم .. بلاش متاجرة بالحتة الدينية دي لمزاجك أنتي !!

 

• بدل ما يتجوز أتنين .. يروح يجوّز شاب مش لاقي ؟

 

- خلاص بدل ما تاكلي فراخ ولحمة كُلي بصارة على طول وأكّلي ناس مش لاقية، وماتجيبيش Brands وعيشي في تقشف .. بلاش مزايدة ع الناس! براحته ع فكرة.. يعف شاب، يتجوز هو، أو يعمل الاتنين هو حر !!

=

 

• على فكرة .. ربنا خلق لآدم حواء واحدة .. مش 4 ؟

 

- كدا أنتي فتكة يعني!! ما احنا ماقولناش إن التعدد فريضة، ده Option عايز يعدد براحته، مش هيقدر أو خايف ميعدلش، يبقي واحدة بس أو ما ملكت يمينه.. ولو اتجوز اتنين وظلم واحدة فيهم بييجي يوم القيامة وشقّه مائل من الظلم !!

 

• ربنا قال: "و لن تعدلوا" يبقا مفيش تعدد أصلاً ؟

 

- انتي هتخترعي دين جديد! قولي الآية صح.. "ولن تستطيعوا أن تعدلوا بين النساء ولو حرصتم"، ودي مقصود بيها العدل القلبي مش اللي بتقوليه ومعناها إن الراجل مينفعش يظلم زوجة بسبب الحب !!

 

• المفروض يراعي مشاعر مراته وميجرحهاش.. دي قسوة ؟

 

- ومعانا إتهام تاني للنبي والصحابة والتابعين بالقسوة وعدم مراعاة مشاعر النساء .. أنضف ناس في الأمة .. يعني أحسن مني ومنك ألف مرة في مراعاة مشاعر النساء .. فـ مفيش تعارض بين الاتنين.

وربنا عاتب النبي وقال له: "لِمَ تحرم ما أحل الله لك تبتغي مرضاة أزواجك"؟! .. يعني ليه بتحرم على نفسك حاجة حلال عشان ترضي مراتك !!

عشان "مارية القبطية" لما "حفصة" غارت منها، وقيل عشان قصة العسل ..

 

• أيوة بس ليه هي تعيش غيرانة وليه ربنا يكتب عليها كدا ؟

 

- إبتلاء من ضمن الإبتلاءات اللي ربنا كتبها على بنات آدم. عادي.. زي آلام الحمل والولادة والآم الحيض والنفاس اللي بتمنعها مِن الصلاة.

ربنا كتب القتال على الصحابة وقال: "كُتِبَ عليكم القتال وهو كره لكم"، ينفع نقول اشمعنى!! وربنا ألزم الرجل بالنفقة علي زوجته وأولاده، ينفع يقول اشمعني!!.. أهو التعدد برضو إختبار وربنا قدَّره على بعض النساء.

 

﴿إِنَّ اللَّهَ وملائكتَه يُصلُّون علَى النَّبِي يا أيُّها الَّذينَ آمَنُوا صَلُّوا عليْه وَسَلمُوا تسْليمًا﴾.

 

الدكتوره منار عبد الفتاح استاذه الفقه المقارن





أبحث عن أختبار